გულითადად ვულოცავთ ქართული მართლმადიდებლური სასულიერო განათლების მთავარ კერას – თბილისის სასულიერო აკადემიას დაარსებიდან 30 წლის იუბილეს. სამი ათეული წელია ქვეყნის უპირველესი საღვთისმეტყველო სასწავლებელი დიდი წარმატებით ემსახურება ერში რწმენით გასხივოსნებული ცოდნის დამკვიდრებას, ჩვენი საზოგადოების სულიერ და ინტელექტუალურ გაძლიერებას. განუზომელია იუბილარი სასწავლებლის – გელათისა და იყალთოს აკადემიების ღირსეული მემკვიდრის – წვლილი ქართველი ხალხის ცხოვრებაში მშობლიური ეკლესიის მიერ თანდათანობით და მტკიცედ თავისი კუთვნილი ადგილის აღდგენაში, საქართველოში მართლმადიდებელი ეკლესიის აღორძინების უმნიშვნელოვანეს საქმეში, რომლის სულისჩამდგმელი სრულიად საქართველოს კათოლიკოს-პატრიარქი, აკადემიის დამფუძნებელი და მისი პირველი რექტორი, უწმინდესი და უნეტარესი ილია II ბრძანდება.

აკადემიის მოღვაწეობის შედეგია, რომ საქართველოს ჰყავს თეოლოგების საყოველთაოდ აღიარებული სკოლა. აღსანიშნავია, რომ აკადემია, რომელიც ჩვენში მღვდელმსახურებისა და თეოლოგების მომზადებისთვის ცოდნის ძირითადი ტაძარია, ამავე დროს ქვეყნის ერთ-ერთი გამორჩეული კულტურულ-საგანმანათლებლო და სამეცნიერო-კვლევითი ცენტრია. მისი თაოსნობითა და აქტიური მონაწილეობით ხორციელდება უაღრესად საყურადღებო კვლევები ჰუმანიტარული მეცნიერების სხვადასხვა დარგში, იმართება მეტად ნაყოფიერი სამეცნიერო ფორუმები მიძღვნილი თეოლოგიისა და მეცნიერების ურთიერთმიმართების, ქართველოლოგიის, კავკასიოლოგიის, ქრისტიანული ხელოვნებისა და სხვა მიმართულებების აქტუალური პრობლემების შესწავლისადმი. სწორედ ამ ცენტრის დამსახურებაა რომ დღეს საქართველოში გვაქვს არაერთი სოლიდური საღვთისმეტყველო პერიოდული გამოცემა, კრებული და ფუნდამენტური ხასიათის პუბლიკაციები თუ მრავალრიცხოვანი მრევლისთვის განკუთვნილი სასულიერო ლიტერატურა. სასიამოვნოა იმის ხაზგასმა, რომ აკადემია-სემინარიის მრავალმხრივ საგანმანათლებლო და სამეცნიერო მოღვაწეობას დიდი შრომითა და რუდუნებით წარმართავს პროტოპრესვიტერი, თეოლოგიისა და ფილოლოგიის მეცნიერებათა დოქტორი, პროფესორი გიორგი ზვიადაძე.

საქართველოს მეცნიერებათა ეროვნული აკადემია გულწრფელად უერთდება ქართული საზოგადოებრიობის ერთსულოვან განწყობას, კიდევ ერთხელ მხურვალედ ულოცავს თბილისის სასულიერო აკადემიას სახელოვან იუბილეს და უსურვებს შემდგომ წარმატებებს ერისა და ქვეყნის სამსახურში.

საქართველოს მეცნიერებათა ეროვნული

აკადემიის პრეზიდენტი

აკადემიკოსი   გ. კვესიტაძე

საქართველოს მეცნიერებათა ეროვნული

აკადემიის ვიცე-პრეზიდენტი

აკადემიკოსი  რ. მეტრეველი

მამა გიორგი ზვიადაძე პირადად გვასწავლიდა ორ საგანს და დიდი როლი აქვს ჩვენს სულიერ და ინტელექტუალურ წინსვლაში. გვახსოვს სიტყვები,რომელსაც ხშირად გვეუბნებოდა „თქვენ რომ დაამთავრებთ აკადემიას და რომ დაბრუნდებით თქვენს-თქვენს მხარეში, ნათელს შეიტანთ ხალხში,ნათელს შეიტანთ ადამიანებში და ამის გამო თქვენ ეშმაკისთვის მიუღებლები იქნებითო“. ზუსტად ამ ნათლის გავრცელებას ებრძოდა და ებრძვის დაცემული ძალა და მისი მთავარი სამიზნე არის,არამარტო კურსდამთავრებულები ამ სასწავლებლისა, არამედ,უპირატესად ის ადგილი,სადაც იძენენ სტუდენტები ცოდნას,სადაც არის სამჭედლო მომავალი სასულიერო პირებისა, სადაც ადამიანებს ეფინებათ ნათელი ქრისტესი და იღებენ იმ მაცხოვნებელ სწავლებას რაც უამრავი ადამიანის გადარჩენას უკავშირდება.

ამ ბძოლის გააქტიურება დაკავშირებულია იმასთან,რომ აკადემია წლიდან წლამდე მიდის უკეთესობისაკენ,გაიხსნა დოქტორანტურა, გამოიცა წიგნები, ეწყობა კონფერენციები,ითარგმნა ლიტერატურა და სასწავლო პროცესი მიდის სულ უფრო მეტი წარმატებისკენ. ჩვენ ეს ყველაფერი არ შეგვიძლია არ ვთქვათ და არ გამოვხატოთ მადლიერება ადმინისტრაციის და პროფესორ-მასწავლებელების მიმართ.რამოდენიმე მათგანის სახელს და გვარს მოვიყვანთ მათდამი უდიდესი მადლიერების და სიყვარულის გრძნობიდან გამომდინარე. ესენი არიან ბატონი ედიშერ ჭელიძე, დეკანოზი ბესარიონ ცინცაძე,დეკანოზი მაქსიმე ჭანტურია,დეკანოზი მიქაელ გალდავა,დეკანოზი შალვა კეკელია, ბატონი გრივერ ფარულავა,ბატონი რევაზ სირაძე, ქალბატონი ნინო მელიქიშვილი,ქალბატონი რუსადან წიქვაძე, გიორგი გვასალია, ირაკლი ორჟონია,გიორგი თოდუა,გიორგი ჯულაყიძე,მამა ირაკლი ახალაძე(ჩვენი იმჟამინდელი დეკანი) და უამრავი სხვა ადამიანი, ესენი იღწვოდნენ და თავს არ ზოგავდნენ ჩვენთვისაც და ახლაც,აკადემიის წინსვლისათვის და თითოეული სტუდენტის კეთილად გაზრდისათვის.

გვახსენდება მისი უწმინდესობის საოცარი სიტყვები „მოგმართავთ ყველას, განსაკუთრებით ახალგაზრდებს, შეინარჩუნეთ ჩვენი თვითმყოფადობა, ჩვენი ტრადიციული ქრისტიანული ცხოვრების წესი. გახსოვდეთ, მთავარი ბრძოლა ბოროტთან მოგებულია. უფალი ბრძანებს: „ნუ გეშინინ, რამეთუ მე მიძლევიეს სოფელსა“ (ინ.16,33) მაშ, იბრძოლეთ, ჩვენი გმირი წინაპრების მსგავსად, რათა საკუთარ თავში და თქვენს გარშემო დაიცვათ თქვენი წილი საქართველო. დღეს ეგ ომია თქვენი დიდგორი, თქვენი ბასიანი.“ ამ სიტყვების გამოძახილია ჩვენი ეს მოკრძალებული წერილი .
დიდება და მადლობა ღმერთს ყველაფრისათვის.

დიდი მადლობა მის უწმინდესობას მისი დიდი სიყვარულისა და იმ დიდი ღვაწლისათვის რაც აქვს ჩვენი ერის წინაშე. ღმერთმა დიდხანს გვიცოცხლოს მთელი ერისთვის უსაყვარლესი პატრიარქი.
დიდი მადლობა ჩვენს რექტორს, მამა გიორგი ზვიადაძეს თავისი თავდადებისთვის და უდიდესი სიყვარულისთვის,რასაც იჩენს ეკლესიის და აკადემიის წინაშე.
დიდი მადლობა ყველას, ვინც ძალიან მაღალ საფეხურზე აიყვანა თბილისის სასულირო აკადემია და სემინარია. ამინ

პატივისცემით 2009-2014 წწ. კურსდამთავრებულები

წყარო: https://www.facebook.com/profile.php?id=100018418778272&lst=100000225918790%3A100018418778272%3A1498475327

ჩვენს მწუხარებას კი იწვევს ის, რომ ყოველ დილას, 9 საათზე, აღარ მოგვიწევს სემინარიაში მოსვლა. თუკი ჩაგვეძინება დილას, აღარ დაგვირეკავს ჩვენი დეკანი, რომელიც შეგვახსენებს, რომ გვაგვიანდება და დასწრების ქულები გვაკლდება, ვეღარ ვნახავთ ყოველდღიურად ლექტორებს, რომლებიც ჩვენი უფროსი მეგობრები უფრო არიან დღეს, ვიდრე – ლექტორები, ამ სიტყვის კლასიკური გაგებით, ვეღარ ვნახავთ ერთმანეთს. აუცილებლად უნდა ითქვას ერთი რამ: ეს არის სასწავლებელი, სადაც ისეა შეზავებული სწავლის პროცესი და ადამიანური ურთიერთობები, რომ ისინი არა თუ უშლიან ხელს, არამედ ავსებენ ერთმანეთს და, ვფიქრობთ, ეს ყველაზე დიდი დადებითი მხარე არის ამ სასწავლებლისა.

მადლობას ვუხდით ჩვენი მხრიდან ყველა ლექტორს, რომლებიც მონდომებით ცდილობდნენ ჩვენთვის ცოდნის გადმოცემას, ჩვენს უსაყვარლეს დეკანს – მამა თეიმურაზს, რომელიც სამაგალითო ადამიანია ყველა მხრივ და რომლის დამსახურებაცაა ის, რაც ამ წერილში წერია. მადლობას ვუხდით პრორექტორს, მამა ბესარიონს, რომელიც ყოველთვის მზად იყო ჩვენს მოსასმენად და ცდილობდა ჩვენს დახმარებას, ასევე – მოძღვრებს, რომლებიც მუდამ ინტერესდებოდნენ ჩვენი ავკარგიანობით; და ბოლოს, მადლობას ვუხდით ჩვენს რექტორს- პროტოპრესვიტერ გიორგი ზვიადაძეს, რომელმაც გვიპატრონა ეს წლები და რომლის ყველაზე დიდი დამსახურებაც ის არის, რომ ასეთი ადამიანები შემოკრიბა ჩვენ გარშემო.

პატივისცემით თბილისის სასულიერო სემინარიის 2017 წლის კურსდამთავრებულები

მე თვითონ სასულიერო სემინარიის სტუდენტი 1998 წელს გავხდი, ვცხოვრობდი სასწავლებლის პანსიონში. სასულიერო სემინარიაში გატარებული წლები ჩემი სულიერი ცხოვრების ახალი, მნიშვნელოვანი ეტაპი იყო, რაც მთავარია, სწორედ აქ შევიძინე მთელი ცხოვრების მთავარი გასაღები – ცოდნა.

ჩემი აქ ყოფნის განმავლობაში ბევრი რამ შეიცვალა უკეთესობისაკენ, სწავლა საკმაოდ მაღალ დონეზეა ასული, სტუდენტებს საფუძვლიანი განათლების მიღების პირობები აქვთ შექმნილი.

მინდა, მადლობა გადავუხადო თბილისის სასულიერო აკადემიისა და სემინარიის პროფესორ-მასწავლებლებს მათი ღვაწლისთვის. განსაკუთრებით გამოვყოფ ჩვენი რექტორის, პროტოპრესვიტერ გიორგი ზვიადაძის დამსახურებას საქართველოს მართლმადიდებელი ეკლესიის წინაშე, და მასაც პირადად ვუხდი მადლობას სასულიერო აკადემიის კედლებში გაწეული დიდი და ერთგული სამსახურისთვის.

არქიმანდრიტი სერაფიმე ჭედია, სვეტიცხოვლის საპატრიარქო ტაძრის წინამძღვრის მოადგილე.